«SAYLAW HÁM JASLAR» ILAJI ÓTKERILDI

Usı jıldıń 14 oktyabr kúni Nawayi mámleketlik kánshilik instituti Nókis filialinda saylaw huqıqı, saylawlardıń áhmiyeti haqqında “Saylaw hám jaslar” atamasında saylawaldı úgit-násiyat ilajı ótkerildi.

Onı filialdıń Jaslar máseleleri hám ruwxıy-aǵartıwshılıq isleri boyınsha direktor orınbasarı Q.Yusupov basqarıp bardı.

Ilajda Ózbekstan Respublikası Oliy Majlisi Senatı janındaǵı jaslar parlamenti aǵzası, “Yuksalish” ulıwma milliy háreketi Qaraqalpaqstan Respublikası aymaqlıq bólimi koordinatorı Ǵ.Seytekov tárepinen Prezident saylawınıń áhmiyeti, Saylaw kodeksi, saylaw nızamshılıǵına kirgizilgen ózgerisler hám de qosımshalardıń mazmunı haqqında maǵlıwmatlar berildi.

Sonıń menen birge, jaslar – saylawlarǵa jurtımız turmısındaǵı eń áhmiyetli, jámiyetimizdiń barlıq iskerlik tarawılarında ámelge asırılıp atırǵan reformalardıń mazmunı tiyisli, hár bir saylawshı táǵdirine tásir kórsetetuǵın siyasiy waqıya retinde jantasıwları kerekligi ayrıqsha aytıp ótildi.

Ushırasıw  dawamında   jaslar  saylawǵa  baylanıslı  ózlerin qızıqtırǵan sorawlarǵa juwaplar aldı.

Filial Baspasóz xızmeti.

MÁMLEKETLIK SIYLIQTIŃ LAUREATLARI MENEN USHIRASIW

Búgin Nawayı mámleketlik kánshilik institutı Nókis filialında Zulfiya atındaǵı mámleketlik sıylıǵınıń laureatı, Ózbekstan mámleketlik jáhán tilleri universitetiniń magistrantı Sh.Bazarbaeva hám “Nihol” mámleketlik sıylıǵınıń iyesi, xalıqaralıq tańlawlar jeńimpazı, NMPI magistrantı M.Turebekovlar menen ushırasıw shólkemlestirildi.

Ilajdı filialdıń Jaslar máseleleri hám ruwxıy-aǵartıwshılıq isleri boyınsha direktor orınbasarı Q.Yusupov basqarıp bardı.

Ushırasıw barısında filialdıń student-jaslarında ózleri menen teńles Sh.Bazarbaeva hám M.Turemuratovlardıń erisken tabısları, jetiskenlikleri ózgeshe tásir qaldırdı.

Sonday-aq, baqsı M.Turemuratovtıń janlı hawazda atqarǵan xalıq qosıqları jıynalǵanlardı ayrıqsha tásirlerge bóledi.

Ushırasıw kóterińki keypiyatta dawam etti.

Filial Baspasóz xızmeti.

Кем тәмийинленген шаңарақларға материаллық жәрдем көрсетиў және кәмбағаллық пенен гүресиў көлемин және де кеңейтиў илажлары ҳаққында

Өзбекстан Республикасы Президентиниң пәрманы

Бала тәрбиялап атырған шаңарақларды қоллап-қуўатлаў системасының нәтийжелилигин арттырыў, социаллық қорғаў ҳәм жәрдемге мүтәж шаңарақлардың материаллық тәмийнатын күшейтиў, мүтәж шаңарақларды анықлаўда улыўма тән алынған халықаралық стандартларды ҳәм автоматласқан ашық-айдын электрон баҳалаў механизмлерин енгизиў арқалы напақаларды төлеў системасын балалардың имканиятын раўажландырыў ҳәм кәмбағаллықты қысқартыўға қаратыў мақсетинде:

  1. Сондай тәртип орнатылсын, оған муўапық 2021-жыл 1-сентябрьден баслап:

а) 14 жасқа шекемги балалары болған шаңарақларға напақа және бала 2 жасқа толғанына шекем оны тәрбиялаў напақасы орнына кем тәмийинленген шаңарақларға балалар напақасы (кейинги орынларда-балалар напақасы) енгизиледи. Онда, балалардың напақасын тайынлаўда:

инабатқа алынатуғын балалардың жасы 14 жастан 18 жасқа шекем арттырылады;

төлеў мүддети 6 айдан 12 айға шекем созылады;

оның муғдарын шаңарақтағы балалар санынан келип шығып белгилеў тәртиби қолланылады;

б) жеке-жалғыз болған пуқараларға, перзенти болмаған ямаса барлық перзентлери 18 жастан үлкен болған кем тәмийинленген шаңарақларға материаллық жәрдем тайынланады.

  1. 2021-жыл 1-сентябрьден баслап балалар напақасы ҳәм кем тәмийинленген шаңарақларға материаллық жәрдем төлемлериниң төмендеги муғдарлары белгиленсин:

а) балалар напақасының ҳәр айлық муғдары:

255 000 сум – 3 жастан 18 жасқа шекемги бир перзенти ушын, 325 000 сум – жасы 3 жасқа шекемги бир кишкене перзенти ушын;

150 000 сум – шаңарақтың екинши перзенти ушын қосымша;

100 000 сумнан – шаңарақтын үшинши ҳәм оннан кейинги ҳәр бир перзенти ушын;

б) кем тәмийинленген шаңарақлар ушын материаллық жәрдемниң айлық муғдары- 380 000 сум.

Онда, 2021-жыл 1-сентябрьге шекем тайынланған 14 жасқа шекемги балалары болған шаңарақларға напақа, бала 2 жасқа толғанына шекем оны тәрбиялаў напақасы және кем тәмийинленген шаңарақларға материаллық жәрдемди төлеў мүддетлери тамамланғанына шекем, усы түрдеги напақалар ҳәм материаллық жәрдемниң әмелдеги муғдарлары және оларды төлеў мүддетлери сақлап қалынады.

  1. Қаржы мнистрлиги 2021-жылдың ақырына шекем балалар напақасы ҳәм материаллық жәрдем алыўшы кем тәмийинленген шаңарақлар санының орташа 20 процентке артыўын есапқа алған ҳалда 2021-жылы бул илажларды қаржыландырыўға бюджеттен қосымша қаржы ажыратсын және Мәмлекетлик бюджеттиң 2022-жылдағы параметрлерин қәлиплестириўде усы пәрманның әмелге асырылыўына байланыслы қәрежетлерди нәзерде тутсын.
  2. Сондай тәртип орнатылсын, оған муўапық 2021-жыл 1-октябрьден баслап, «Социаллық қорғаўдың бирден-бир реестри» мәлимлеме системасы арқалы кем тәмийинленген деп тән алынған шаңарақлар ҳәм шахслар ҳаққындағы мағлыўматлар мәпдар министрликлер ҳәм уйымларға «Электрон ҳүкимет» системасы уйымлараралық интеграцияласыў платформасы арқалы бериледи.

Қаржы министрлиги (Т.Ишметов) Мәлимлеме технологиялары ҳәм қоммуникацияларын раўажландырыў министрлиги (Ш.Садиков) менен биргеликте «Социаллық қорғаўдың бирден-бир реестри» мәлимлеме системасы мағлыўматлар базасындағы кем тәмийинленген деп тән алынған шаңарақлар ҳәм шахслар ҳаққындағы мағлыўматлар министрликлер ҳәм уйымларға «Электрон ҳүкимет» системасы уйымлараралық интеграцияласыў платформасы арқалы берилиўи және мәлимлеме алмасыўының нәтийжели ислеўин тәмийинлесин.

  1. Қаржы министрлиги (Т.Ишметов) Экономикалық раўажланыў ҳәм кәмбағаллықты қысқартыў министрлиги (И.Норқулов), Мәҳәлле ҳәм шаңарақты қоллап-қуўатлаў министрлиги (Р.Маматов), Бәнтлик ҳәм мийнет қатнасықлары министрлиги (Н.Хусанов) менен биргеликте 2021-жыл 20-августқа шекем төмендегилерди нәзерде тутатуғын Ҳүкимет қарарының жойбарларын Министрлер Кабинетине киргизсин:

кем тәмийинленген балалы шаңарақларға напақаны және кем тәмийинленген шаңарақларға материаллық жәрдемди тайынлаў ҳәм төлеў тәртиби;

минимал тутыныў қәрежетлериниң баҳасын есаплаў тәртиби.

  1. Қаржы министрлиги, Экономикалық раўажланыў ҳәм кәмбағаллықты қысқартыў министрлиги, Өзбекстан Миллий мәлимлеме агентлиги, Өзбекстан Миллий телерадиокомпаниясы, Мәлимлеме ҳәм ғалаба коммуникациялар агентлиги усы Пәрманның мақсети, ўазыйпалары ҳәм буннан күтилип атырған нәтийжелерди ғалаба хабар қураллары, Интернет ҳәм социаллық тармақларда кеңнен сәўлелендириў жумысларын шөлкемлестирсин.
  2. Өзбекстан Республикасы Президентиниң ҳәм Өзбекстан Республикасы Ҳүкиметиниң айырым ҳүжжетлерине 1-қосымшаға муўапық өзгерислер ҳәм қосымшалар киргизилсин.
  3. 8. Өзбекстан Республикасы Президентиниң ҳәм Өзбекстан Республикасы Ҳүкиметиниң айырым ҳүжжетлери 2-қосымшаға муўапық өз күшин жойытқан деп есаплансын.

9.Қаржы министрлиги бир ай мүддетте нызамшылық ҳүжжетлерине усы Пәрманнан келип шығатуғын өзгерислер ҳәм қосымшалар ҳаққында Министрлер Кабинетине усыныс киргизсин.

  1. 1 Усы Пәрманның орынланыўын нәтийжели шөлкемлестириўге жуўапкер ҳәм жеке жуўапкер етип қаржы министри Т.А.Ишметов және экономикалық раўажланыў ҳәм кәмбағаллықты қысқартыў министриниң биринши орынбасары И.И.Норқулов белгиленсин.

Пәрманның орынланыўын додалап барыў, жуўапкер орынлаўшы шөлкемлердиң жумысын муўапықластырыў ҳәм қадағалаў Өзбекстан Республикасы Бас министриниң орынбасары Ж.А.Қўчқоровқа жүкленсин.

Әмелге асырылып атырған илажлардың нәтийжелилиги бойынша Өзбекстан Республикасы Президентине 2021-жыл 1-ноябрь ҳәм 2022-жыл 1-апрельге шекем мәлимлеме берилсин.

Өзбекстан Республикасы

Президенти Ш.МИРЗИЁЕВ

Ташкент қаласы,

2021-жыл 11-август

Қарақалпақстанда жаслар фестивалы: Бозатаўда «Жаслар ҳаўазы» фестивалы шеңберинде илажлар болып өтпекте

Президентимиздиң басламасы менен шөлкемлестирилген «Жаслар ҳаўазы» фестивалының республикалық басқышы Қарақалпақстан Республикасында болып өтиўи мәлим етилген еди. Бүгин ерте таңда Нөкис темир жол вокзалында және Нөкис халықаралық аэропортында «Bozataw Fest»тиң жуўмақлаўшы басқышы қатнасыўшылары, өз аймақларында теңсиз деп табылған жас талант ийелери және мийманлар салтанатлы түрде күтип алынды.

 

7-10-июнь күнлери болып өтетуғын жаслар фестивалында бир-биринен қызықлы, есте қаларлық ҳәм тәкирарланбас бағдарламалар ислеп шығылған. Атап айтқанда, бүгинги күн тәртибинде Бозатаў районындағы Жаслар орайында белгили ҳәм жас дөретиўшилер менен ушырасыў, поэзиялық топлам презентациясы, миллий өнерментшилик көргизбеси ҳәм Бердақ атындағы Жаслар бағында қарақалпақ тағамлары фестивалы болып өтпекте.

 

Сондай-ақ, қатнасыўшылар Бозатаў районындағы мәҳәлле жаслары арасында спорттың футбол, гүрес, баскетбол, волейбол түрлери бойынша өткерилетуғын жарысларды тамашалайды.

 

Бозатаў амфитеатрында кешки ўақытта үлкен байрам – «Bozataw Fest»тиң салтанатлы ашылыўы болып өтеди.

 

Солай етип, жақын күнлерде фестивальдың дәслепки жеңимпазлары анықланады.

 

Төменде сиз Бозатаў районында фестиваль шеңберинде өткерилип атырған илажларды тамашалаўыңыз мүмкин.

 

https://kknews.uz

ҮГИТ-НӘСИЯТ ИЛАЖЫ ШӨЛКЕМЛЕСТИРИЛДИ

Жақында Наўайы мәмлекетлик кәншилик институти Нөкис филиалында Нөкис қаласы ҳакимлигиниң 2021-жыл 13-май күнги «Өзбекстан Республикасы Министрлер Кабинети  жанындағы Дин ислери бойынша комитетиниң 2021-жыл  11-май күнги 01-08/3182-санлы хаты»на  муўапық социаллық-руўхый орталықты тәмийинлеў ҳәм динлерара баўрыкеңликти беккемлеў бойынша «Ғалабалық мәденият» атамасында үгит-нәсият жумысларын күшейттириў мақсетинде илаж шөлкемлестирилди.

Илажды Наўайы мәмлекетлик кәншилик институты Нөкис филиалының Ҳаял-қызлар мәселелери бойынша мәсләҳәт кеңеси баслығы Г.Даўлетназарова алып барды . Мәжилисте Нөкис қаласы ҳәкимлигиниң Дин ислери бойынша бас қәнигеси Х.Незаматов, Қарақалпақстан Мусылманлар қазыяты Ҳаял-қызлар мәселелери бойынша қазы жәрдемшиси Т.Досымбетова, Нөкис қалалық угит-нәсиятлаў топары баслығы З.Сатбаева, Нөкис қалалық ИИБ жас өспиримлер менен ислесиў бойынша инспекторы, лейтенант А.Таңирбергеновалар шығып сөйледи .

Баянатшылардың атап өткениндей, бүгинги күнде жасларымызға бир қанша имканиятлар жаратылып берилип атырғанлығы, жасларымыздың спорт, мәденият тараўларында яки басқа да тараўларда өзлериниң талантларын көрсетип атырғанлығынкелтирип өтти.

Илаж соңында филиал студентлери  өзлериниң қызықтырған сораўларына тараў қәнигелеринен жуўаплар алды.

А.Кеўлимжаева,

Б.Жолдасбаева,

 ҚМУ студентлери

“ЭРАСМУС+” БАҒДАРЛАМАСЫ ҲАҚҚЫНДА СЕМИНАР ШӨЛКЕМЛЕСТИРИЛДИ

Бүгин Наўайы мәмлекетлик кәншилик институты Нөкис филиалында Zoom программасы арқалы семинар шөлкемлестирилди.

Онлайн илажды филиалдың Оқыў ҳәм тәрбиялық ислер бойынша директор орынбасары Д.Жумамуратов басқарып барды.

Онда Бердақ атынрдағы Қарақалпақ мәмлекетлик университети журналистика кафедрасының доценти, Эрасмус+ бағдарламасының Өзбекстандағы координаторы Б.Палўанов филиал профессор-оқытыўшылары хәм зийрек студентлери ушын “Эрасмус+” бағдарламасы шеңбериндеги проектлер хәм грантларды жеңип алыў ҳәм де оның усыллары ҳаққында кең түрде түсиниклер берип өтти.

Ҳақыйқатында да, “Эрасмус+” бағдарламасы жоқары билимлендириўде үлкен имканиятларды береди. Дүньяның раўажланған мәмлекетлериниң топ университетлерине барып тәжирийбе арттырыў, илимниң соңгы жаңалықлары менен танысыўды қәлеўши профессор-оқытыўшылар ҳәм студент-жаслар семинар даўамында өзлерин қызықтырған сораўларына тараў қәнигесинен жуўаплар алды.

Филиал Баспасөз хызмети.

KIYINIW MÁDENIYATI – MÁDENIYATLILIQ ÚLGISI

Kiyiniw mádeniyatı-insannıń sırtqı kórinisi, ishki dúnyası, estetikası, minez-hulqın, talǵamın ashıp beredi. Kiyiniw mádeniyatına bolǵan kóz-qaras insannıń gózzallıq, náziklik, ádep-ikramlılıq kóz qarasların sáwlelendiriwshi xızmetti de atqaradı.

Sonı ayrıqsha aytıp ótiw kerek búgingi globallasıw processinde kiyimler hám kiyiniwge bolǵan itibar hám de talap ózgerip barmaqta.

Jaslardıń, ásirese, student-qızlardıń moda izinen quwıwı, jańadan shıqqan tar, ashıq, kelte kiyimlerdi moda dep esaplap, bul túrdegi kiyimler, álbette, kiyiliwi kerek dep oylawı haqıyqat bolıp esaplanadı. Bul kiyimlerdiń biziń mentalitetimizge say emesligi haqqında oylap ta otırmaydı. Tiykarında kiyiniw mádeniyatı bızıń mádeniyatımızdıń ajıralmas bólegi bolıp esaplanadı.

Kópshilik jaslarımız evropa usılında kiyinbewdi zamannan artta qalıw dep esaplaydı. Bul pikirdıń natuwrı ekenligin túsındırıw maqsetinde Nawayı mámleketlik kánshilik institutı Nókis fililalı student-qızlarına kiyiniw mádeniyatı temasında seminar shólkemlestirildi.

Bul seminardan gózlengen maqset – student-qızlarǵa kiyiniw mádeniyatı haqqında keńirek túsinik beriw, sonıń menen birge kiyimniń insan salamatliǵına baylanıslı táreplerin aytıp ótiw bolıp esaplanadı.

Seminar dawamında filial psixologi tárepinen shólkemlestirilgen psixologiyalıq trening de kiyiniw mádeniyatı menen baylanıslılıǵı menen ajıralıp turdı.

G.Dawletnazarova.

Ғалабалық абаданластырыў ҳәм көклемзарластырыў акциясы

Өзбекстан Республикасы Президенти Ш.Мирзиёевтиң Олий Мажлиске жоллаған Мүрәжатында белгиленген ўазыйпалардың орынланыўын тәмийинлеў, сондай-ақ, халықтың, әсиресе жаслардың экологиялық мәдениятын арттырыў, қоршаған орталыққа болған итибарын күшейтиў, ана тәбиятты келешек әўлад ушын сақлаў, экологиялық жағдайды жақсылаў ҳәм жүз берип атырған унамсыз тәсирдиң алдын алыў  илажлары көрилмекте.

Атап айтқанда, өткен шемби күни Нөкис қаласында «Жаңа Өзбекстанда еркин ҳәм абат жасайық!»  сүрени астында «Таза қала» жойбары шеңберинде ғалабалық абаданластырыў ҳәм көклемзарластырыў акциясы болып өтти. Бул баслама Өзбекстан жаслар ислери агентлиги Қарақалпақстан Республикасы басқармасы тәрепинен қоллап-қуўатланды.

Нөкис қаласындағы «Жаслар орайы» имаратының алдында жаслар басламасының салтанатлы ашылыў мәресими болды. Онда Қарақалпақстан Республикасы Министрлер Кеңесиниң Баслығы Қ.Сариев, Өзбекстан Республикасы Олий Мажлиси Сенатының Аралбойы регионын раўажландырыў мәселелери комитетиниң баслығы Б.Алиханов ҳәм басқалар шығып сөйлеп, жасларымыздың бул басламасының әҳмийетине тоқтап өтти ҳәм оларға әўмет тиледи.

Илажда Нөкис қаласын таза аймақ ҳәм жасыл белбеўли қалаға айландырыў, жаслардың санасында экологиялық мәдениятты арттырыў, елимизде әмелге асырылып атырған жәмийетлик-сиясий өзгерислерде жаслардың қатнасын арттырыў ҳәм оларда Ўатанды сүйиўшилик сезимлерин жетилистириў мақсетинде Өзбекстан жаслар ислери агентлиги Қарақалпақстан Республикасы басқармасы тәрепинен ислеп шығылған  www.ncity.uz сайты арқалы абаданластырылыўы зәрүр болған 61 аймақ картаға жайластырылды. Илаж алдынан белсенди 300 ден зыят жастан ибарат «Кеўилли жаслар» отряды шөлкемлестирилип, белгиленген аймақларда халықтың арасында үгит-нәсият жумысларын алып барды.

Жойбарда қатнасыўшы министрликлер, кәрхана ҳәм шөлкемлердиң ўәкиллери, оқыў орынлары жасларының қатнасында өзлерине бириктирилген аймақларда абаданластырыў ҳәм көклемзарластырыў жумыслары әмелге асырылды. Соның ишинде, Қарақалпақстан Республикасы бажыхана басқармасы тәрепинен бағыўшысынан айырылған шаңарақларға үй жумысларында жәрдем берилген болса, Арқа-батыс әскерий округи әскерлери тәрепинен «Шорша баба», «Салмен ата» қойымшылықлары абаданластырылды.

Илаж шеңберинде «Эко патруль» акциясы шөлкемлестирилип,  «Жаслар орайы» әтирапында «Каръера» жас кадрларды таярлаў клубының ағзалары  тәрепинен гүллер бағын жаратыў ислери алып барылды. Буннан тысқары, 9 «Кеўилли патронаж жаслар» отряды тәрепинен «Ветеранлар ҳүрметимизде» жойбары бойынша урыс ҳәм мийнет ветеранлары, бағыўшысынан айырылған, майыплығы болған, жалғыз баслы пуқаралар медициналық тексериўден өткерилди. «Пидайы жаслар» тәрепинен усындай 21 пуқараның үй жумысларына жәрдем берилип, олар жасап атырған турақ жайларының әтирапы абаданластырылды. Сондай-ақ, жәрдемге мүтәж шаңарақларға азық-аўқат өнимлери, дәри-дәрмақ тапсырылды. Үлкемизге келип атырған қуслардың көбейиўи менен бир топар жаслар тәрепинен «Қусларға ғамқорлық етемиз» сүрени менен уялар жасалып, тереклерге қыстырып шығылды.

-Илажда жасларымыз өзлериниң басламасы менен қатнасып, Нөкис қаласының тазалығына үлесин қосып атыр,-дейди Өзбекстан жаслар ислери агентлиги Бозатаў районлық бөлиминиң баслығы Нызаматдин Төремуратов. –Келешекте районымызда да усындай жойбарды өткериўди режелестирип отырмыз.

Жасларымыздың басламасы менен әмелге асырылған илаж даўамында 4250 түп мийўе, 18260 түп саяманлы терек ҳәм мыңға шамалас гүл нәли егилди. Нөкис қаласынан 225 тонна шығынды алып тасланды. Усы күни мийнет еткен 20 мыңға жақын, соның ишинде жаслар халқымызға тән мийрим-шәпәәт, кеңпейиллик ҳәм жақсылық пазыйлетлериниң үлгисин көрсетти. Келеси усындай илаж Тақыятас қаласында болып өтеди.

И.В.Савицкий атындағы Қарақалпақ мәмлекетлик көркем өнер музейи алдындағы майданда «Таза қала» жойбарында белсене қатнасқанларды сыйлықлаў мәресими болды. Онда  Қарақалпақстан Республикасы Жоқарғы Кеңесиниң Баслығы М.Камалов, Қарақалпақстан Республикасы Министрлер Кеңесиниң Баслығы Қ.Сариев қатнасып, жасларды қайырлы басламалары менен қутлықлады. «Ең белсенди пуқаралар жыйыны», «Ең белсенди жаслар отряды», «Ең жақсы баслама», «Ең белсенди мәкеме» ҳәм басқа да бир қатар номинациялар бойынша жеңимпазлар анықланып, шөлкемлестириўшилер тәрепинен диплом ҳәм естелик саўғалары менен сыйлықланды.

Илаж көркем өнер шеберлериниң гала концерти менен жуўмақланды.

 

Д.АБИБУЛЛАЕВ,

Қарақалпақстан хабар агентлигиниң шолыўшысы

Taza qala

2021 жыл 17-апрель. Наўайы мәмлектлик кәншилик институты Нөкис филиалының хызметкерлери де «Таза қала» жойбарында өзлериниң белсендилигин көрсетти.

Баслама – жасап атырған аймағымызға тазалық ҳәм гөззалық инәм етиўши, абаданластырыў жойбары.

Филиал хызметкерлери Дослық каналы бойында абаданластырыў жумысларын алып барды.

Taza qala

2021 жыл 17-апрель. Наўайы мәмлектлик кәншилик институты Нөкис филиалының студент- жаслары «Таза қала» жойбарында республикамыздың барлық жаслары қатарында өзлериниң белсендилигин көрсетпекте.

Баслама – жасап атырған аймағымызға тазалық ҳәм гөззалық инәм етиўши, абаданластырыў жойбары.

Филиал студентлери Нөкис қаласындағы абаданластырылыўы тийис болған «Дослық гүзары» ҳәм «Темир жол» мәкән пуқаралар жыйыны аймағында абаданластырыў жумысларын алып бармақта…