ФИЛИАЛ МӘЛИМЛЕМЕ-РЕСУРС ОРАЙЫНА КИТАПЛАР САЎҒА ЕТИЛДИ

Бүгинги күнде мәмлекетимизде жәмийетлик турмыста ийгиликли қәдриятлар менен дәстүрлердиң орнын беккемлеўге, атап айтқанда, жас әўладтың руўхый-интеллектуаллық потенциалын, сана-сезимин ҳәм дүнья таныўын кеңейтиўде, ана Ўатаны ҳәм халқына муҳаббат ҳәм садықлық сезими менен жасайтуғын бәркамал шахсты тәрбиялаўдағы шексиз әҳмийетке ийе болған китапқумарлық мәдениятын арттырыўға айрықша итибар қаратылмақта.

Усы жылдың 28-сентябрь күни Наўайы мәмлекетлик кәншилик институты Нөкис филиалында келешегимиз ийелери болған жас-әўладтта китапқумарлық мәдениятын раўажландырыў, олардың китапқа болған қызығыўшылықларын еледе арттырыў мақсетинде илаж шөлкемлестирилди.

Илажды филиал директоры А.Каипбергенов басқарып барды.  Илажда Нөкис қаласы ҳәкими мәсләҳәтшиси Б.Абдреймов, Өзбекстан Республикасына хызмет көрсеткен мәденият хызметкери, “Фидокорана хизматлари учун” ордени ийеси, шайыр Ш.Аяпов, республика Руўхыйлық ҳәм ағартыў орайы Нөкис қалалық бөлиминиң баслығы Қ.Нуратдиновлар шығып сөйлеп, филиал жәмәәтин 1-октябрь – “Муғаллимлер ҳәм устазлар күни” байрамы менен қызғын қутлықлады ҳәм филиал мәлимлеме-ресурс орайына 150 дана көркем-әдебий китаплар ҳәм жаслар тәлим-тәрбиясына байланыслы методикалық қолланбаларды саўға етти.

Илаж даўамында шайыр Ш.Аяпов филиал студент-жасларына өзиниң қосықларынан оқып берди. Бул өз гезегинде филиалымыздың студент-жасларына руўхый заўық бағышлады.

  

 

Филиал Баспасөз хызмети.