ҚАРАР – ҲӘРЕКЕТТЕ

Бәршемизге мәлим, 2021-жыл 16-июль күни Қарақалпақстан Республикасы Жоқарғы Кеңеси Президиумының «Қарақалпақ тилин жəне де раўажландырыў ҳәм тил сиясатын жетилистириў илажлары ҳаққында»ғы 410-санлы қарары қабыл етилди.

Қарақалпақстан Республикасы Жоқарғы Кеңеси Президиумының 2020-жыл 3-ноябрьдеги «Қарақалпақ тилиниң мәмлекетлик тил сыпатындағы абырайын ҳәм орнын және де арттырыў илажлары ҳаққында»ғы қарары тийкарында Қарақалпақстан Республикасы Министрлер Кеңеси жанында Мәмлекетлик тилди раўажландырыў департаменти шөлкемлестирилип, мәмлекетлик тилди раўажландырыў, мәмлекетлик тилдиң ҳәрекет етиўи менен байланыслы машқалаларды анықлаў ҳәм сапластырыў бағдарында бир қанша унамлы жумыслар əмелге асырылмақта.

Сондай-ақ, қарақалпақ тилиниң жазыў нормалары ҳәм қағыйдаларын жетилистириў, заманагөй атамалардың қарақалпақша сыңарларын жаратыў ҳәм бир түрде қолланылыўын тәмийинлеў, географиялық ҳәм басқа да топонимикалық объектлерге нызам ҳүжжетлерине муўапық атамалар бериў илажлары алып барылмақта.

Усы жылдың 28-август күни Наўайы мәмлекетлик кәншилик институты Нөкис филиалында тараў қәнигелери менен Қарақалпақстан Республикасы Жоқарғы Кеңеси Президиумының «Қарақалпақ тилин жəне де раўажландырыў ҳәм тил сиясатын жетилистириў илажлары ҳаққында»ғы 410-санлы қарарын филиал профессор-оқытыўшылары ҳәм хызметкерлерине жеткериў мақсетинде семинар шөлкемлестирилди.

Илажды филиалдың Жаслар мәселелери ҳәм руўхый-ағартыўшылық ислери бойынша директор орынбасары Қ.Юсупов басқарып барды. Онда Өзбекстан Илимлер академиясы Қарақалпақстан Республикасы бөлими Гуманитар илимлер илим-изертлеў институты директоры, Қарақалпақстан Республикасы Министрлер Кеңеси жанындағы Қарақалпақ тилин раўажландырыў фондының Қәўендерлик кеңесиниң ағзасы А.Альниязов қарардың әҳмийети ҳаққында филиал профессор-оқытыўшыларына ҳәм де бөлим хызметкерлерине кең түрде түсиниклер берип өтти.

Семинар жуўмағында қатнасыўшылар өзлерин қызықтырған сораўларға жуўаплар алды.

Филиал Баспасөз хызмети.